Amaphoyisa esifundazwe saKwaZulu-Natal agasele ngovivi endaweni yasePhoyinti esedolobheni laseThekwini neyaziwa ngokuba isizinda sabokufika kuleli nalapho kwaziwa ukuthi badayisa izidakamizwa udede, kanye nobunye ubugebengu obunhlobobhlobo ababenzayo.
UKhomishana wamaphoyisa esifundazweni saKwaZulu-Natal uMkhwanazi uthe balinganiselwa ekhulwini namashumi amabili abokufika (120 foreigners) abatholakele kuleyandawo nalapho betholakale nezinto eziningi ezingekho emthethweni kubalwa izikhali eziyingozi nezibhamu ezingekho emthethweni, imali yaseMelika yohlobo lwamadola elinganiselwa ezigidini ezingamashumi amane (40 million dollars) yomgunyathi, izidakamizwa ezihlukahlukene kanye nabaduna amabhilidi.
Labaduni bamabhilidi kubikwa ukuthi abayikhokhi intela yomkhandlu benjalonje baxhume amanzi ngokungekho emthethweni kanye nogesi abawusebenzisayo ukokoteliwe ukuze bengeke bawukhokhele. Kulabo abaqashisa ngalamabhilidi kuthe makufuneka izimvume zobuninindawo kwathomba okhiye kutholakala ukuthi azikho, nalapho ezikaShamase zabagaxe amasongo kasgonyela.
Umphathi wamaphoyisa uMkhwanazi ukuqinisekisile ukuthi banenkinga enkulu yezidakamizwa eThekwini kwazise ichweba liseduze, nokuyichweba elikhulukazi esifundazweni nokwenza ukuthi amanye amakhontena afike nezidakamizwa. Noma ekhona amaphoyisa asebenza khona agcina engakwazanga ukuwabheka wonke ngenxa yobuningi.